မိူဝ်ႈၼႆႉ တူၵ်းမႅၼ်ႈဝၼ်းၵိူတ်ႇတပ်ႉသိုၵ်းၸိုင်ႈတႆးၶွပ်ႈၶူပ်ႇ(62) ပီႊတဵမ် ၼႆလႄႈ ၽူႈမီးပုၼ်ႈၽွၼ်း ၾၢႆႇတပ်ႉ ၾၢႆႇဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈတႆး ၊ တပ်ႉသိုၵ်းၸိုင်ႈတႆး (SSPP/ SSA) ဢွၼ်ၵၼ်ၸတ်းႁဵတ်းပၢင်ၵႅဝ်ႈ ဝၼ်းၵိူတ်ႇတပ်ႉသိုၵ်းၸိုင်ႇတႆး (SSA) ၶွပ်ႈ ၶူပ်ႇ (62) ပီႊတဵမ် ၼႆယူႇယဝ်ႉ။
မိူဝ်ႈၼႆႉ လိူၼ်ဢေႇပိူဝ်ႊ(24) ဝၼ်း ၶၢဝ်းယၢမ်း ၵၢင် ၼႂ်(09:00) မူင်း တေႃႇထိုင် ဝၢႆးဝၼ်း (13:00) မူင်း ၼၼ်ႉ ယူႇတီႈၽူႈမီး ပုၼ်ႈၽွၼ်း ၼႂ်းတပ်ႉငဝ်ႈသိုၵ်း (989) လႄႈ ၸေႈတွၼ်ႈ ၸေႈဝဵင်း ၶဝ်တၢင်းသဵင်ႈ ႁူမ်ႈၵၼ် ဢွၼ်ႁူဝ်ၸတ်းႁဵတ်း ပၢင်ၵႅဝ်ႈဝၼ်းၵိူတ်ႇတပ်ႉသိုၵ်း ၶွပ်ႇၶူပ်ႇ(62) ပီႊတဵမ် ဢွင်ႈတီႈ ဝၢၼ်ႈတႃႈၸၢင်ႉ ဢိူင်ႇ (22) ဝၢၼ်ႈ ၸေႈဝဵင်းမၢႆ(12) ၼမ်ႉ ၶမ်း သေ မီးၽူႈယႂ်ႇၵူၼ်းလူင်၊ ၽူႈၵွၼ်းတပ်ႉ၊ လုၵ်ႈတပ်ႉ ၾၢႆႇ တပ်ႉ ၾၢႆႇ ဢုပ်ႉပိူင်ႇ ဢိၵ်ႇပႃး ပေႃႈမႄႈ ၵူၼ်းမိူင်း ႁူမ်ႈသဵင်ႈ ၽူႈၶိုၼ်ႈႁွတ်ႈမီး (900) ၵေႃႉပၢႆ ၼႆယူႇယဝ်ႉ။
ၼႂ်းၼၼ်ႉ မီးၵႅမ်ႁူဝ်ပဝ်ႈ(2) ၸွမ်သိုၵ်း ၶုၼ်သႅင် မွၵ်ႈလၢတ်ႈၶေႃႈၵႂၢမ်း ၶႆႊၼႄပိုၼ်းပဵၼ်မႃး ဝၼ်းတပ်ႉသိုၵ်း ၸိုင်ႈတႆး လႄႈ သပ်းလႅင်းၼႄ ပိုၼ်းလွင်ႈ ၸဵပ်းသၢင်ႈ ၵူၼ်းမိူင်း ၸိုင်ႈတႆး ၸဵမ်ၸိူဝ်းၼႆႉယူႇယဝ်ႉ။
လိူဝ်သေၼၼ်ႉ မိူၼ်ၼင်ႇၼႂ်းၼႃႈလိၼ်သိုၵ်း တပ်ႉငဝ်ႈသိုၵ်း(748)၊ တပ်ႉငဝ်ႈသိုၵ်း (798) ၊ တပ်ႉငဝ်ႈသိုၵ်း (969) ၸဵမ်ၸိူဝ်းၼႆႉၵေႃႈ ယူႇတီႈ ၽူႈမီးပုၼ်ႈ ၽွၼ်း ၵေႃႇမတီႇ တပ်ႉငဝ်ႈသိုၵ်း ၊ တပ်ႉၸုမ်း ၊ ၸေႈတွၼ်ႈ၊ ၸေႈဝဵင်းၶဝ် ႁူမ်ႈ ၵၼ် ဢွၼ်ႁူဝ်သေ လႆႈၸတ်းႁဵတ် ပၢင်ၵႅဝ်ႈဝၼ်းၵိူတ်ႇတပ်ႉသိုၵ်း ၸိုင်ႈတႆး(SSA) ၶွပ်ႇ ၶူပ်ႇ (62) ပီႊတဵမ် လႄႈ ၼႂ်းၼၼ်ႉ မီးၽူႈၶိုၼ်ႈ ႁွတ်ႈ ၼိုင်ႈတီႈလႂ် (300)ၵေႃႉပၢႆ တေႃႇထိုင် (500)ၵေႃႉ ပၢႆ ၼႆ ယူႇ ယဝ်ႉ။
တပ်ႉသိုၵ်းၸိုင်ႈတႆး(SSA) ၼႆႉ ၵေႃႉပဵၼ်လုၵ်ႈယိင်း ၸဝ်ႈသူၺ်ႇတႅၵ်ႈ (ၸဝ်ႈၾႃႉယွင်ႁူၺ်ႈ) ဢၼ်ပဵၼ် ၸဝ်ႈ မႄႈၼၢင်းႁိူၼ်းၶမ်း ၼၼ်ႉ လႆႈႁူၺ်းသူၼ်း ဢဝ် ၸုမ်းလုၵ်ႉၽိုၼ်ႉ ဢၼ်ၸွတ်ႇ ၽႄႈယူႇၼႂ်းမိူင်း ၸိုင်ႈတႆး မိူၼ်ၼင်ႇ တပ်ႉသိုၵ်းလွတ်ႈလႅဝ်းသဝ်း ၶေႃ ၸိုင်ႈတႆး (SSIA) ၊ တပ်ႉသိုၵ်း ၽွမ်ႉႁူမ်ႈၸိူဝ်ႉၸၢတ်ႈ ၸိုင်ႈတႆး (SNUF) ၊ တပ်ႉသိုၵ်း ၵဝ်ႈၵၢင်ႉ ဢၼ်ၸဝ်ႈလႅတ်ႇဢွၼ်ႁူဝ်ၸဵမ်ၸိူဝ်းၼႆႉ ႁႂ်ႈယႃႉလႅဝ်ပႅတ်ႈ ၸိုဝ်ႈ ၸုမ်းၽႂ် မၼ်းသေ မိူဝ်ႈလိူၼ် ဢေႇပိူဝ်ႊ ၊ 24 ဝၼ်း ၊ ပီႊ 1964 ၼီႊ ၼၼ်ႉ တၢမ်တူဝ် ၸဝ်ႈမႄႈ ၼၢင်းႁိူၼ်းၶမ်း လႆႈ ဢွၼ်ႁူဝ် ၶွတ်ႇၽွတ်ႈ ၶိုၼ်ႈမႃး ပဵၼ်တပ်ႉသိုၵ်းၸိုင်ႈတႆး (SSA) ၼႆယူႇယဝ်ႉ။
